آخر نعوش التنمية بكسلا، وعمايل عطاءات الويست

آخر نعوش التنمية بكسلا، وعمايل عطاءات الويست

 

– تمهيد –

باشمهندس معتز مدير الويست – المنسق لبرنامج المياه والبيئة بين الحكومة والمنظمات – وهو الجهة المنوط بها فرز عطاءات الشركات المتنافسة علي المشاريع الممولة من قبل المنظمات،.

 

فقرة -1-

وبعد تعريفنا للمدير ومهامه نكشف للحكومة وعموم الجمهور الكسلاوى عن عمايل شركة نازحة اسمها (الاسمد) وكيلها ساكن في استراحة الويست، وظاهر انو فردة لمعتز مدير الوست، ويا فوضي كسلا تجي شركة الاسمد تقدم في عطاء مااااكن ، في البدئ تم حرمانها لعدم استيفائها لشرط الحساب البنكي المطلوب، لكن المير معتز بنفسه يمشي لناس الشراء والتعاقد في المالية ويستبعد هذا الشرط عشان عيون شركة الاسمد تلغف ليها عطاء سمين علي حساب الولاية الهملة،،

 

– – فقرة 2 –

وان شاء الله الشغل الفاضح دة ماحيصل يا عزو لانو ناس كسلا ما حيسمحو بي تسلل الشركات الطرزانية ، فمشاريع الويست مشاريع مصيرية ما ممكن تترك لهوى شاب يافع زى معتز يتلاعب بمصيرها، لازم الناس تعرف ان عهد مدير الهيئة السابق عثمان محجوب قد انتهي والفوضي والضبابية حتكون مفضوحة، والناس ليها بالمرصاد، ولو انت يا عزو شريك في الاسمد او حقتك من تحت تحت، الاشياء دى كلها مرصودة، ويؤسفنا انك عامل فيها ود الولاية لكن ما بترعي مصالحها، ولسة اشواق عثمان محجوب مسيطرة عليك، ودي ما حتمشي علي ناس البلد،

 

– فقرة 3 –

ولازم تعرف يا عزو ان زولك بتاع الاسمد بتاع ود مدني إنكشفت اوراقو وألاعيبو، وما حتقدرو تاكلو علي ظهر ناس كسلا، ونحنا عليك بالمرصاد وحنطلع ليكم ملف كامل عن الشغلانيات الدافنينها سوا ،،

 

فقرة – 4 –

السيد الوالي

والباشمهندس مدير هيئة المياه،

ببدو از الولد معتز طووول كتييير في الويست لغايت ريحتو ضربت وبقي مستضيف شركات نازحة في مكاتب واستراحة الحكومة وبعد دة عاوز يمرر ليها عطاءات ويكسر ليها اللوائح ويفتكر مال المنظمات حاجة سايبة، وهنالك مشاريع قام بافشالها عمدا في عهد ود محجوب المدير السابق، وتحتاج مراجعة ومحاسبة وعقاب، ودة كولو جايي،

 

– فقرة5 –

السادة الوالي ومدير الهيئة كفاااية للجني معتز مدير الويس، لازم الجني معتز تجيبو ليهو بديلو ولازم بديلو يكون زول نضيييف،

الزول دة وجوده حيشوه سمعة الهيئة ويشكك المنظمات الممولة في نزاهة الحكومة، وفي النهاية مواطن الولاية حيبقي الضحية، وطبعا المواطن خياراتو مفتوحة وما حيسكت ولا حيتفرج لفوضي الجني معتز الذي يعتبر رباية، المدير السابق عثمان محجوب، ومافيش فايدة لتغيير المدير وابقاء فضلاتو ، وما حنخليهو يسرح ويمرح بمصير المشاريع الخدمية وسوف نتخذ ضده كل الخطوات الممكنة من اعلامية وقانونية، وكمان نقفل ليهو المكتب مالم تتحر الحكومة وتتخذ التدابير العاجلة لابعاد هذا الشاب المختل الاداء والذي يستضيف ويحابي مدير شركة نازحة بمحسوبية صارخة ومستفزة للقاصي قبل الداني،

 

– – فقرة 6 – وللمعلومية هذه المعلومات مجرد خطوط عريضة وما خفي من تفاصيل اعظم ، وكفانا مآسي حرب وفيضانات وخراب بيئة وصحة عامة وخاصة وامراض فتاكة، ولن نقبل فوق العلينا فساد منتن يهدد حبة المشاريع الخدمية الممولة من المنظمات الاجنبية من خلال لوبي افندية فاسدين، وهم اخطر من الجنجويد، لان من كان رباية المدير السابق سيدمر الاخضر واليابس، وسوف نرفع المشاريع التي اهدرت فيها مبالغ طائلة بسبب هذا الجني المشئوم، والقاعد لينا في موقع اكبر منه مهنيا واخلاقيا،

 

– فقرة7-

ويا حكومة الولاية وهيئة المياه قبل ما يجيكم راس السوط لازم تقطعوا راس الفساد باجتثاث بقايا المدير السابق القحاتي الحقود،

وفي الحلقة القادمة حنجيب ليكم نماذج حية من الفساد الاداري والمهني من جميع محليات الولاية، وسوف نستجلي التحقيقات من خبراء في الصحة والمياه والمنظمات والقانون ومواطنين حادبين وميدانيين !!!!!!